Gure eskola sistema

PISA txostena. Oinarriak zaindu beharko.

Pisako dorre ospetsua zaintzeko oinarrietan dago giltzarria

Oporretan ezagutu ditut azken PISA txosteneko emaitzak.  Sevillan. Espainiako eta Andaluziako zenbait hedabideen ikuspegia irakurri eta entzuteko aukera izan dut. Canal Sur, Onda Cero, ABC, El País… Interesgarria da zelan erabil daitezkeen datu batzuk bakoitzak bere astoari arre egiteko. Onda Cero-ko iritzi-emaileen arabera datuak Espainian oso txarrak eta Zapateroren politika eskasaren errua… Gaitzak hezkuntza sistema hamazazpi hezkuntza sistematan apurtu zenean hasi omen ziren, errepikatzen zuen batek… ABC-koek oso ondo konparatzen zituzten neska-mutilen arteko aldeak eta sistema publiko-pribatuen arteko aldeak. Artikulua irakurrita alaba eskola publikotik ateratzeko gogoa piztu zitzaidan. (Eta sexua aldatzearena begiratzeko).  El País-ekoek Espainiako autonomien arteko rankinga egiten zuen, batez ere. Espainiako iparralde-hegoalde aldeak azpimarratzen zituen.  Canal Surreko iritzi-emaile ofizialistak datu orok daukan errore margena azpimarratzen zuen. Andaluzian 15 urteko ikasleen % 43 errepikatu du ikasturteren bat…

Denbora beharko dut PISAko emaitzak zuzenean irakurtzeko. Axaletik ez bada ere. Are denbora gehiago datu horien gainean egindako ikerketa eta gogoeta mamitsuak ezagutzeko…  Ea gabonetan edo.

Beti bezala, gustatu zaizkit Josu Sierrak egindako laburpen + iritzi artikuluak. [0][1][2]

Mendebaldeko euskaldun bezala, ikustea OCDE datuen batez bestearen inguruan gabiltzala ez da harrotzeko modukoa. Ikusiko dugu hezkuntzak jasan dituen murrizketa ekonomikoek-eta zelako emaitzak ekartzen dituzten hemendik urte gutxitara.

Azpimarratzekoa da, nire ikuspegitik, %15ek bakarrik egitea proba horiek euskaraz. Nik ez dut oraino ikusi emaitzak bi talde horietan desglosaturik:  proba euskaraz egin zutenen (%15,5) emaitzak eta probak gaztelaniaz (%84,5) egin zutenen emaitzak. Zelako irakurtzeko gaitasuna erakutsi dute bi talde horiek? Euskal herritar euskaldunak ze moduz moldatu dira probak euskaraz eginda?

Nik susmoa daukat PISAkoek oso ondo neurtzen dutela neurtzen dutena. Pena gauza asko neurtu gabe uztea. Ze moduz bigarren, hirugarren eta laugarren hizkuntzetako gaitasunak? Zer moduz informazioa kudeatzeko gaitasuna? [eta abar]

Oraingoz, kontu horietan sakontzeko gogoa. Besterik ez.

Ez ohiko azterketak

Ebaluazio jarraitua egin beharko genukeen garaietan nahiko harrigarria da ekainean 3. ebaluazioko azterketak egin behar izatea eta gero, berriro, astebete beranduago,  3. ebaluazioko azterketa ez ohikoak.

Ebaluazioaz

Neurtzen ez dena ezin da hobetu.

[Lord Kelvini egotzi egin zaion esalditxoa]

Ikasturte amaieran gure komunikatzeko gaitasuna neurtzen ibili gara.

Ikasturtea amaitzear eta aurten egindako lana ebaluatu behar.

Ikasturte hasieran esan bezala, ikasturte honetan egindako lanaren kantitatea eta kalitatea neurtzen saiatuko gara.

Diagnosi ebaluazioaren emaitzak 2009

Nork begiratzen ditu jagoleak?

Duela egun batzuk argitaratu dituzte Diagnosi-ebaluazio lehen proben emaitzei buruzko txostenak.
Lehenago ere kontu horiei buruz nire iritzi batzuk bota ditut blog honetan.

Interesgarria iruditu zaizkit txosteneko zenbait pasarte. Taula hau, esate baterako:

ISEK indizearen batez besteko balioak (Indize sozio-ekonomiko eta kulturalaren balioak)

A publikoa    -0,68 Baxua

B publikoa     -0,35 Ertain baxua

D publikoa     -0,12 Ertain altua

Itunpeko A 0,24 Altua

Itunpeko B 0,08 Ertain altua

Itunpeko D 0,16 Ertain altua

Kanpoko hezkuntza adituren batek datu hauek ikusiko balitu, ez luke oso erraz ulertuko zergatik aldi berean A eredua ISEK altuen eta baxuen duten familiek aukeratu duten. Publikoan baxuen, itunpekoan altuen.

Txostena irakurtzen jarraituz gero, kanpoko hezkuntza adituak galdetuko luke ea hizkuntzen komunikazio gaitasun mailari buruzko datu horiek zer adierazten duten, A1, A2, B1, B2, C1… Europan egindako neurketa Europan ulertzeko moduko datuak beharko… Txosten osoa irakurrita ere ez luke galdera xinple horren erantzuna topatuko. Galdetuko luke, agian, ea zergatik ez da ahozko adierazpenari buruzko inolako neurketarik egin. Arazo logistikoak, ezta? galdetuko luke.

Txostena irakurrita, galdetuko lieke, agian, hezkuntza arduradunei ea bi hizkuntza ofizial duen lurralde batean ez ote den penagarria euskara neurtzen neurtu den hori.  Hezkuntza arduradunak arrazoi historiko eta soziolinguistiko ugarirekin erantzungo lioke.

Hezkuntza aditu atzerritarrak galdetuko lioke orduan ea ze plan dauden hori guztia konpontzeko, A ereduarena, batez ere, begi bistakoena, baina baita ere beste ereduetakoa… Euskara emaitzak, oro har, oso txarrak dirudite, ezta?

Gaztelaniazko emaitzak Indize Sozio Ekon. eta Kulturalari oso lotuta daudela ikusten bada eta euskararen emaitzak, aldiz, hizkuntza ereduei askoz lotuago…  Gaztelaniazko emaitzetan hiru ereduak  ISEKaren atzetik badabiltza baina bestalde, euskaraz, A eta B ereduek D ereduak baino emaitza nabarmen okerragoak erakutsi badituzte ISEK horretatik haratago, zertarako nahi dituzue hiru ereduak? Gaztelania ziurtatzeko ez badira, eta ez dira, agi denez; are gutxiago euskara, ezta?

Hezkuntza arduradun autoktonoak harro erantzungo lioke. Euskararen emaitza horiek konpon bidean dauzkagu, sisteman ingeles gehiago sartuta eta A ereduan astero euskara ordu bat gehiago sartuta… Gainera ikastetxe bakoitzak bere hobekuntza plan berezia prestatzen arituko da une honetan… Hurrengo neurketan ikusiko dira egindako hobekuntzen emaitza onak!

Hezkuntza adituak, orduan, bere herrialdera itzulita hemen ikusi eta ikasitakoarekin txotena prestatu beharko luke. Asterix eta Obelixen esaldi hura erabiltzeko gogoa, izenburuan bertan.

Txoroak dira gero erromatar hauek!

Diagnosi-ebaluazioaren emaitzak jasota adabakiekin jarraituko?

Aurten argitaratu dira, historian lehen aldiz, diagnosi-ebaluazio emaitzak. Aurreko ikasturtean, 2009. urteko udaberrian,  egin ziren neurketa horiek EAEko ikastetxe guztietan. ISEI-IVEIk prestaturiko probak. Gure hezkuntza sistema kanpotik ebaluatzeko beharrezkoa zen lanabesa izango zirela esan ziguten.

Lehen Hezkuntzako 4. mailako eta Derrigorrezko Bigarren Hezkuntzako 2. mailako ikasleek proba batzuk egin behar izan zituzten. Beraien   komunikatzeko gaitasuna, euskaraz eta gaztelaniaz, neurtu nahi ziren alde batetik  eta  matematikarako, zientziarako, teknologiarako  eta osasun kulturarako gaitasunak bestetik. Ikastetxeen esku geratu zen azken proba hauek ze hizkuntzatan egitea aukeratzea.

Artikulu hau luzea da. Egin klik azpiko keep reading —> horretan irakurtzen segitzeko edo eskuratu artikulu osoa  pdf formatuan.

Balio erantsi gutxiko lana

Hona hemen balio erantsi gutxiko idazlana zer den. Azalpena eta adibidea.

Lehenengo adibidea:

“Denok ikusi ditugu Microsoft-ek I’m a PC izeneko kanpainan argitaratu dituen bideoak. Oso ohikoa ez bada ere, 8 urteko ikasle batek gai hau atera zuen Ikasys proiektuan erabiltzen hasi diren Acer Aspire One ultraeramangarri berriak ikusi zituzten lehen egunean. Ordenagailuak piztu eta eurentzat ohikoa ez zen pantaila bat zabaldu zitzaienean, era guztietako iruzkinak egiten hasi ziren. Zer da hau? Euskaraz dago! Musika politagoa dauka!… Ikasle batek etxean zer edo zer ikusita eta entzunda zeukanez, protagonismoa hartu eta azalpenak ematen hasi zen. Egia esateko, dena nahasten zuten eta gaia patxada gehiagorekin jorratu beharko genukeela pentsatu nuen.Pentsatu eta baita egin ere. Ondorengo bi bideo hauek ikusi eta eztabaidatzeari ekin genion.

Open Source »

Richard Stallman »

Han sortu zen bideo hau egiteraen ideia. Egia esan behar baldin badut, ez dakit ikasle hauek zenbateraino jabetzen diren gai honetaz, baina “kontrakanpainaren” ideia gustatu zitzaien eta gidoia berehala ekoiztu zuten. Ainhitzeren letra dotorea txartelak egiteko aprobetxatu eta listo. Hortxe duzue emaitza.

Oharra: Guk ere, Microsoft-ekoek bezala, bideoa Mac batekin editatu dugu. Inkoherentzia ez dadila izan euren patrimonioa!”

Orain azalpena. Idazlan polita sartu dut kakotxoen artean pentsatuko du baten batek. Batez ere originala ezagutzen ez duen baten batek. Originala ezagututa, kopia baten kopia bat egin dudala ikusiko du. Euskal Jakintzakoek Microsoften publizitatearen kopia egin zuten. Kopia hutsa? Ez. Originala hobetu zuten, nik uste.

Nik kopiaren kopia egin dut. Hitzez hitz.

Ezin esan nik egindakoa ez duela balio erantsirik. Urruti zegoena hurbilago ekarri dut nire ikasleentzat, kakotxoen artean kopiatu dut, eta gainera iturria txintx0-txintxo aipatuko dut: IKTeroak, Magic

Are gehiago, nik ikasgelan emandako azalpen batzuen osagarri legez erabili dut goiko idazlana eta originalari izenburua aldatu diot. Izenburu originala ingelesez zegoen eta nirea euskaraz, itzuli barik.

Baina IKTeroak blog horretan zegoen testua ez badut inorentzat hurbildu, nire post honen balio erantsia = zero